AŞPA-dan çıxmaq Avropa İttifaqı ilə əlaqələri kəsəcək? - İkili standartlara qarşı növbəti addım
Azərbaycanın Avropa Şurası ilə münasibətlərində yeni mərhələnin mümkünlüyü gündəmə gəlib. Belə ki, Prezident İlham Əliyev Şuşada keçirilən IV Şuşa Qlobal Media Forumununda çıxışı zamanı bildirib ki, Azərbaycan Avropa Şurasından tam çıxmaq məsələsini nəzərdən keçirir.
Mövzu ilə bağlı TodayPress TV-yə danışan politoloq Yusif Bağırzadə deyib ki, Prezident İlham Əliyevin Azərbaycanın Avropa Şurasından tam çıxmaq variantını nəzərdən keçirdiyini açıqlaması ölkənin bu qurumla münasibətlərində yaranmış ciddi fikir ayrılıqlarının davam etdiyini göstərir:
"Məlumdur ki, Azərbaycan 2001-ci ildə Avropa Şurasına üzv qəbul olunarkən bu addım ölkənin Avropa siyasi və hüquqi məkanına inteqrasiyası baxımından mühüm mərhələ hesab edilirdi. Üzvlük çərçivəsində Azərbaycan Avropa Şurasının müxtəlif mexanizmlərində iştirak edib, o cümlədən Avropa İnsan Hüquqları Konvensiyasına qoşulub və Avropa İnsan Hüquqları Məhkəməsinin yurisdiksiyasını tanıyıb. Bu baxımdan mümkün çıxışın əsas nəticələri məhz hüquqi və siyasi sahələrdə özünü göstərə bilər".
Politoloq əlavə edib ki, hazırkı narazılığın əsas səbəblərindən biri Azərbaycan nümayəndə heyətinin Avropa Şurası Parlament Assambleyasındakı fəaliyyət hüquqlarının məhdudlaşdırılması ilə bağlıdır. Onun sözlərinə görə, Azərbaycan bunu haqlı olaraq siyasi yanaşma və ikili standartlar olaraq qiymətləndirir:
"Biz haqlı olaraq hesab edirik ki, AŞPA-da regionda baş verən proseslərə, o cümlədən Ermənistan-Azərbaycan münasibətlərinə dair mövqelərdə balanssızlıq mövcuddur. Mümkün çıxışın Azərbaycanın xarici siyasətinə təsirlərinə gəldikdə, ilk növbədə qeyd etmək lazımdır ki, Avropa Şurası Avropa İttifaqı deyil. Yəni bu qurumdan ayrılmaq Azərbaycanın Avropa İttifaqı ilə münasibətlərini dayandırdığı anlamına gəlmir və bu iqtisadi əlaqələrə birbaşa eyni səviyyədə təsir göstərmir".
Ekspert əlavə edib ki, biz hər hansı beynəlxalq təşkilatda fəaliyyətimizin davam etməsinin tərəfdarıyıq.
"Amma təmsil olunduğum qurum öz haqsız yanaşması ilə bizi nəyəsə məcbur etməyə cəhd göstərirsə o zaman həmin qurumda qalmaq da mənasını itirir. Əgər Avropa Şurasında yanaşma dəyişəcəksə, ölkəmizə təzyiq yox, qarşılıqlı faydalılıq prinsipi ilə yanaşacaqlarsa o zaman ortada hər hansı problem də qalmayacaq. Avropa İnstitutları dərk etməlidirlər ki, Azərbaycan müstəqil xarici siyasət yürüdən, müxtəlif güc mərkəzləri ilə balanslı münasibətlər qurmağa çalışan və istənilən beynəlxalq platformalarda da milli maraqları əsas prioritet kimi götürən bir ölkədir".
Yusif Bağırzadə sonda qeyd edib ki, ölkə başçısının bu istiqamətdə bəyanatı həm siyasi mesaj, həm də strateji seçim kimi qiymətləndirilə bilər.
Türkan İsgəndərli
