17 oktyabr — Füzuli azadlığının 5-ci ilini qeyd edir
“Prezident İlham Əliyevin 31 iyul 2023-cü il tarixli Sərəncamı ilə 17 oktyabr Füzuli Şəhəri Günü kimi müəyyən edilib”.
TodayPress TV xəbər verir ki, bunu Milli Məclisin deputatı Vüqar Bayramov deyib.
O qeyd edib ki, 1827-ci ildə əsası qoyulmuş Füzuli Azərbaycan iqtisadiyyatında, xüsusilə kənd təsərrüfatı məhsullarının istehsalında önəmli paya malik olan rayonlarımızdan olub:
“1993-cü il Ermənistan işğalı nəticəsində Füzuli ərazisinin çox hissəsi tamamilə dağıdıldı, ciddi ziyan dəydi. Böyük hissəsinin işğal edilməsi nəticəsində 83 min 544 dinc sakin didərgin salındı. İşğal nəticəsində Füzuliyə 4 milyard manata yaxın ziyan dəydi. Bütövlükdə, dövlət mülkiyyətində olmuş 22 min 635 əmlak tamamilə məhv edildi. 27 illik işğala məruz qalan Füzuli azad edilmiş torpaqlar arasında minaların sayına görə ən çox çirkləndirilmiş rayondur. İlkin hesablamalara görə yüz mindən çox mina basdırılıb”.
Parlamentari əlavə edib ki, 2020-ci il oktyabrın 17-də işğaldan azad olunan Füzuli şəhəri Prezident İlham Əliyevin tapşırığına əsasən yenidən qurulur və infrastrukturun bərpası istiqamətində irimiqyaslı işlər həyata keçirilir. Füzulidə artıq 3500-dən çox keçmiş məcburi köçkün məskunlaşıb.
“Şəhərin digər yaşayış məntəqələrinin bərpası istiqamətində işlər sürətlənib. Kifayət qədər böyük iqtisadi potensialı olan Füzuli Qarabağ iqtisadiyyatının formalaşmasına və reinteqrasiyasına xüsusi töhfə verəcək. Bu, Füzuli üçün yeni inkişaf səhifəsinin açılması deməkdir”, - deyə V.Bayramov fikrini yekunlaşdırıb.
Qeyd edək ki, 5 il əvvəl – 17 oktyabr 2020-ci ildə Füzuli şəhəri ilə yanaşı, rayonun daha 7 yaşayış məntəqəsi - Qoçəhmədli, Çimən, Cuvarlı, Pirəhmədli, Musabəyli, İşıqlı, Dədəli kəndləri işğalçılardan təmizlənib.
Füzuli əməliyyatı Azərbaycan Ordusunun İkinci Qarabağ müharibəsində cənub-şərq cəbhəsində baş verən ən əhəmiyyətli döyüşlərdən biri olub.
Üstəlik, Füzulinin keçmiş təmas xəttində yerləşən bir neçə müdafiə xəttinin yarılması Azərbaycan Ordusunun cənub cəbhəsi boyunca irəliləməsi üçün geniş imkanlar yaradıb.
Qiymət Mahir
