Bərdədə taxıl biçini prosesinin təşkilinə dair regional müşavirə keçirildi

Kənd Təsərrüfatı Nazirliyi bölgələrdə taxıl biçininə hazırlıq, mövcud vəziyyət və qarşıda duran vəzifələrlə bağlı məlumatlandırma sessiyalarına başlayıb. 

TodayPress TV xəbər verir ki, Bərdə rayonunda keçirilən regional müşavirədə Kənd Təsərrüfatı Nazirliyinin rəhbərliyi, Bərdə və ətraf rayonların icra hakimiyyəti strukturlarının məsul şəxsləri, Dövlət Aqrar İnkişaf Mərkəzlərinin direktorları, “Aqroservis” ASC-nin rəhbər şəxsləri və regional nümayəndəliklərinin, rayon bölmələrinin əməkdaşları, texniki nəzarət müfəttişləri, mühəndislər, mexanizatorlar və fermerlər iştirak ediblər. Tədbirin təşkilində əsas məqsəd cari ildə taxıl biçinini itkisiz və mütəşəkkil həyata keçirməkdir.

Tədbiri giriş sözü ilə açan Bərdə rayon İcra Hakimiyyətinin başçısının müavini İlham Məmmədov bildirib ki, Azərbaycanda taxılçılığın inkişafına dövlət dəstəyi verilir, dövlət dəstəyinin genişləndirilməsi sayəsində ölkədə taxılçılıq ildən-ilə inkişaf edir. Bu il Bərdə rayonunda 13 min hektardan çox sahədə taxıl əkilib, hazırda məhsulun vaxtında və itkisiz yığılması istiqamətində koordinasiya olunmuş fəaliyyət həyata keçirilir. 

Müşavirədə çıxış edən kənd təsərrüfatı nazirinin müavini Elçin Zeynalov qeyd edib ki, Azərbaycan Respublikasının Prezidenti cənab İlham Əliyevin apardığı məqsədyönlü siyasət nəticəsində iqtisadiyyatın digər sahələri kimi aqrar sahə də dayanıqlı inkişaf edir.

Nazir müavini ölkədə aqrar sahədə həyata keçirilən tədbirlər,  taxıl biçininə hazırlıqla bağlı  görülən işlər barədə tədbir iştirakçılarına ətraflı məlumat verib.

Qeyd olunub ki, hər il olduğu kimi bu il də bölgələrdə taxıl biçini prosesinin mütəşəkkil təşkili üçün nazirlikdə operativ qərargah yaradılıb, qərargah tərəfindən biçin prosesində meydana çıxa biləcək çətinliklər əvvəlcədən təhlil edilərək, müvafiq fəaliyyət planı hazırlanıb. Respublika üzrə kütləvi taxıl biçini ərəfəsində bölgələrdə keçirilən məlumatlandırma sessiyaları məhsul yığımının optimal müddətdə, itkisiz başa çatdırılmasına xidmət edir.  

 “Aqroservis” ASC-nin İdarə Heyətinin sədri Mehman Veysəlov vurğulayıb ki, biçin zamanı düzgün dislokasiya planının qurulması üçün kombaynlar GPS nəzarət sistemi ilə təchiz edilib. Bu innovativ nəzarət sistemi biçin zamanı düzgün dislokasiya yaradılması, operativliyin təmin edilməsi, prosesə nəzarət edilməsi və şəffaf idarəetmə mexanizminin qurulmasına imkan yaradır. Bundan başqa, bu ilin mart ayından cari ildə taxıl biçininə hazırlıqla bağlı biçini həyata keçirən mexanizatorlara təlimlər keçirilib. 

Müşavirədə biçin zamanı qarşıya çıxa biləcək çətinliklər, onların həlli yolları müzakirə edilib, fermer və mexanizatorların təklifləri dinlənilib, qaldırılan məsələlərin operativ həlli üçün müvafiq tapşırıqlar verilib.