Vətən müharibəsinin başladığı gündən 6 il ötür
27 Sentyabr – Azərbaycanda Anım Günüdür.
Bu gün 44 günlük Vətən müharibəsinin başlanmasından 6 il ötür. 2020-ci il sentyabrın 27-də Ermənistan silahlı qüvvələrinin mövqelərə və yaşayış məntəqələrinə atəş açmasından sonra Azərbaycan Ordusu əks-hücum əməliyyatlarına başlayıb.
44 gün davam edən müharibə nəticəsində Azərbaycan Ordusu bir sıra yaşayış məntəqələrini və strateji əraziləri işğaldan azad edib. Noyabrın 8-də Şuşanın azad edilməsi müharibənin taleyində mühüm dönüş nöqtəsi olub.
Noyabrın 10-da Azərbaycan, Ermənistan və Rusiya liderlərinin imzaladığı üçtərəfli bəyanatla hərbi əməliyyatlar dayandırılıb. Bəyanata əsasən, Ağdam, Kəlbəcər və Laçın rayonları da Azərbaycana qaytarılıb.
27 Sentyabr – Anım Günündə Vətən müharibəsində və Azərbaycanın ərazi bütövlüyünün bərpası uğrunda həyatını itirən şəhidlərin xatirəsi ehtiramla yad edilir.
Bu tarix Azərbaycan xalqının yaddaşında şəhidlərin fədakarlığı və Vətən müharibəsi ilə bağlı mühüm günlərdən biri kimi qalır. Azərbaycanın ərazi bütövlüyü uğrunda canından keçən bütün şəhidlərimizin xatirəsini dərin hörmət və ehtiramla anırıq.
