"Dürüst desək, elə də bir təşkilli terror hadisəsi deyil bu. Bir nəfərin, naşı psixin özfəaliyyətidir".

TodayPress TV xəbər verir ki, bunu politoloq İlqar Altay  Vaşinqtonda Trampın iştirakı ilə keçirilən tədbirdə baş verən hadisə ilə bağlı danışarkən deyib.

O qeyd edib ki, ilkin məlumatlara görə, atışma Ağ Evdə deyil, Vaşinqtondakı "Hilton" otelində qeydə alınıb: "Tramp və ABŞ administrasiyasının yüksək vəzifəli şəxsləri üçün təşkil edilən şam yeməyindən sonra daxili görüşlər keçirilib.Məlumata əsasən, hücum edən şəxs otelin bitişik korpusunda qalırmış. O, ov tüfəngi (qısa Winchester tipli silah) və əlavə olaraq tapança ilə yanaşı bir neçə bıçaq da üzərində gəzdirib. Şəxs qonaqların olduğu korpusa daxil olmaq üçün binaarası koridordan istifadə etməyə çalışıb. Keçid məntəqəsində təhlükəsizlik yoxlanışı zamanı qəfil atəş açaraq mühafizə polisini hədəf alıb. Güllə zirehli jiletdən dəyərək keçdiyi üçün ciddi xəsarət qeydə alınmayıb.Hadisədən sonra təhlükəsizlik qüvvələri dərhal hərəkətə keçib, tədbir iştirakçıları ehtiyat tədbiri olaraq təxliyə olunub və prezident də daxil olmaqla qonaqlar təhlükəsiz əraziyə çıxarılıb. Qısa müddət ərzində hücum edən şəxsin kimliyi müəyyən edilib. Onun Kaliforniyanın Torrans şəhərindən olan 31 yaşlı Koul Tomas Allan olduğu, ali təhsilli müəllim işlədiyi və əvvəlki dövrlərdə psixoloji müalicə aldığı bildirilir.

"Polis hadisə ilə bağlı geniş araşdırma aparır. Kamera görüntüləri araşdırılır, şahidlər dindirilir və atışmanın motivləri dəqiqləşdirilir. Şübhəlinin yaxın günlərdə məhkəmə qarşısına çıxarılacağı gözlənilir,- o, əlavə edib.

İlqar Altay vurğulayıb ki, Prezident Tramp hadisəyə münasibət bildirərək bunun ona qarşı planlaşdırılmış bir sui-qəsd cəhdi olduğunu qeyd edib. Lakin təhlükəsizlik xidmətləri vəziyyətə operativ və peşəkar şəkildə müdaxilə ediblər.

"Ümumilikdə, hadisənin təşkil olunmuş terror aktı olmadığı, daha çox fərdi və psixoloji problemləri olan bir şəxsin təkbaşına həyata keçirdiyi hərəkət olduğu ehtimal edilir",- analitik fikrini tamamlayıb.

Jalə Rövşən 

TodayPress TV