Azərbaycana məhdudiyyət - Rusiyada azərbaycanlıları nə gözləyir?

“Rusiya Federasiyasından miqrantlara qarşı tətbiq olunan məhdudiyyətlər getdikcə genişlənir və budəfəki qadağalar daha çox selektiv xarakter daşıyır”. 

Bunu Milli Məclisin deputatı Elman Nəsirov TodayPress TV-yə açıqlamasında  deyib. 

O qeyd edib ki, Rusiyanın miqrant siyasətində konkret ayrıseçkilik hökm sürür: 

"Məsələn, Rostov vilayətində 1 aprel – 31 dekabr 2026-cı il tarixlərində miqrantlara kuryer fəaliyyəti, qida, içki və tütünün topdan-pərakəndə satışı qadağan edilir. Başqa bir məlumata görə, 1 martdan etibarən quru və boru kəməri nəqliyyatı, poçt xidmətləri, qiymətli metalların satışı və fitnes sahəsində işləyənlərə də məhdudiyyətlər tətbiq olunacaq. 

Bu məhdudiyyətlərin bir başqa diqqətçəkən tərəfi odur ki, Avrasiya İqtisadi Birliyinin (AİB) üzvü olan ölkələrin vətəndaşlarına — yəni, Belarus, Qazaxıstan, Ermənistan və Qırğızıstan vətəndaşlarına — münasibətdə heç bir qadağa tətbiq edilmir. Lakin Azərbaycan, Moldova, Tacikistan və Özbəkistan vətəndaşlarından, eləcə də “Abxaziya” vətəndaşlarından iş icazəsi alınması tələb olunur. Bu məhdudiyyətlər həmin ölkələrin vətəndaşlarına şamil ediləcək". 

Onun sözlərinə görə, bu miqrasiya siyasəti ilə bağlı bir sıra suallar yaranır: niyə məhz AİB ölkələrinə bu qadağalar tətbiq edilmir? Niyə bu ölkələrin vətəndaşlarına məhdudiyyətlər qoyulmur, amma Avrasiya İqtisadi Birliyinə üzv olmayan ölkələrin vətəndaşları üçün bu addımlar atılır? Azərbaycan da bu təşkilata üzv deyil, yəni birbaşa olaraq Azərbaycan vətəndaşları da bu miqrasiya siyasətinin təhdid obyektinə çevrilə bilər. Bu isə, nəticə etibarilə, Azərbaycan vətəndaşlarının da məhdudiyyətlərlə üzləşməsinə səbəb olacaq və son dövrlərdə iki ölkə arasında yaranan gərginliyi daha da artıracaq.

"Anlaşılan budur ki, rəsmi Moskva sanki öz strateji tərəfdaşı ilə münasibətləri normallaşdırmaq əvəzinə, onları daha da kəskinləşdirmək istiqamətində addımlar atır. Miqrasiya siyasətindəki bu dəyişiklikləri də həmin siyasətin tərkib hissəsi kimi qiymətləndirmək olar. Görünür ki, Azərbaycan Respublikasının müstəqil siyasəti, bu ölkənin milli maraqlarına uyğun mövqeyi, Moskvada bəzilərinin narazılığına səbəb olub", - millət vəkili vurğulayıb. 

Deputat diqqətə çatdırıb ki, Azərbaycan müstəqil və suveren bir dövlətdir, onun lideri isə dünya səviyyəli bir liderdir: 

"Azərbaycanın atdığı addımlar hər zaman milli maraqlara uyğun olub və heç bir zaman üçüncü tərəfi hədəf almayıb. Məsələn, bu gün Bakı-Vaşinqton münasibətlərinin istiləşməsi Moskva ilə münasibətləri hədəfə almır. 2022-ci ildə Moskva ilə imzalanan strateji tərəfdaşlıq və müttəfiqlik sənədi də Vaşinqton və ya Brüssel əleyhinə deyildi. Azərbaycan, müxtəlif güc mərkəzlərindən bərabər məsafədə dayanaraq öz milli maraqlarına əsaslanaraq müstəqil siyasət yürüdür".

E.Nəsirov sonda əlavə edib ki, Azərbaycanın siyasəti anti-Rusiya deyil, əməkdaşlıq və sülhə yönəlib: 

"Bu səbəbdən də mən anlamıram, niyə Kremlin bəzi dairələri Azərbaycanla bağlı bu cür düşünürlər və Azərbaycanın apardığı siyasəti anti-Rusiya siyasəti kimi qiymətləndirirlər. Bu, qətiyyən doğru deyil. Azərbaycanın atdığı addımlar yalnız milli maraqlarına uyğundur və heç bir şəkildə Kremlə və ya başqa bir tərəfə qarşı yönəlməmişdir. Azərbaycan Prezidentinin dünyadakı nüfuzu və hörməti, ölkənin regiondakı əməkdaşlıq mühitini təşviq etməyə yönəlik siyasətinin nəticəsidir, bu siyasət qarşıdurma deyil, əməkdaşlıq yaradılmasına xidmət edir. Bu həqiqəti dünya ictimaiyyəti də qəbul edir və müvafiq nəticələr çıxarır. Təəssüf ki, bunun əksini düşünənlər də var və görünür ki, Rusiyada bəzi siyasi dairələr Azərbaycan Prezidentinin müstəqil və milli maraqlara əsaslanan siyasətindən narazıdır və buna görə də "bulanıq suda balıq tutmaq" siyasətini həyata keçirməyə çalışırlar". 

Jalə Rövşən

TodayPress TV