Paşinyan Azərbaycandan torpaq istədi, əvəzində...
Ermənistanın Baş naziri Nikol Paşinyan Azərbaycanla sərhədlərin yenidən müəyyənləşdirilməsi və ərazi mübadiləsi imkanlarını gündəmə gətirib.
TodayPress TV xəbər verir ki, təklif çərçivəsində anklav və eksklavların aradan qaldırılması, nəqliyyat yollarının açılması və qarşılıqlı ərazi iddialarından imtina edilməsi nəzərdə tutulur.
Paşinyanın yanaşmasına görə, tərəflər müqayisə edilə bilən ölçüdə ərazilərin mübadiləsini müzakirə edə, iki ölkə arasında bütün nəqliyyat əlaqələrini aça və bir-birinə qarşı ərazi iddialarından imtina edə bilərlər.
Ermənistanın baş naziri Qarabağ, Qərbi Azərbaycan, Naxçıvan və digər ərazilərlə bağlı məsələlərin qarşılıqlı şəkildə gündəmdən çıxarılmasının vacibliyini vurğulayıb.
Məlumatda qeyd olunur ki, 2025-ci ilin avqustunda Azərbaycan və Ermənistan liderləri ABŞ Prezidenti Donald Trampın iştirakı ilə Vaşinqtonda birgə bəyanat imzalayıblar. Sənəddə Azərbaycanın əsas hissəsi ilə Naxçıvan arasında Ermənistan ərazisindən keçən nəqliyyat bağlantısının yaradılması ilə bağlı planlar da yer alıb.
Ərazi mübadiləsi ideyası Naxçıvanla Azərbaycanın əsas hissəsi arasında birbaşa əlaqənin yaradılması kontekstində diqqət çəkir. Bununla belə, belə bir mübadilənin razılaşdırıldığına dair təqdim olunan məlumatda təsdiq yoxdur.
Təklifin reallaşması sərhədlərin delimitasiyası, ərazi bütövlüyü, nəqliyyat marşrutlarının hüquqi statusu və tərəflərin qarşılıqlı razılığı kimi məsələlərdən asılı olacaq.
Türkan İsgəndərli
