Netanyahu təcili təhlükəsizlik iclası çağırdı
İsrail Baş naziri Benyamin Netanyahu ABŞ və İran arasında aparılan danışıqlarda irəliləyişlə bağlı xəbərlər fonunda yüksək səviyyəli təhlükəsizlik rəsmiləri ilə təcili görüş keçirməyə qərar verib.
TodayPress TV xəbər verir ki, Netanyahu bu axşam koalisiya hökumətini təşkil edən partiyaların liderləri və yüksək səviyyəli təhlükəsizlik rəsmiləri ilə görüşəcək.
Görüşdə əsas mövzunun İranla bağlı son diplomatik məsələlər olacağı bildirilir.
Məlumata görə, İsrail rəhbərliyi ABŞ-İran danışıqlarında əldə olunan müsbət dinamikanı və regionda yarana biləcək təhlükəsizlik risklərini qiymətləndirəcək.
Qeyd edək ki, ABŞ Prezidenti Donald Tramp daha əvvəl İranla razılaşmaya “çox yaxın” olduqlarını və danışıqların müsbət istiqamətdə davam etdiyini bildirmişdi.
İran Xarici İşlər Nazirliyinin sözçüsü İsmayıl Bəqayi isə Pakistanın vasitəçiliyi ilə aparılan danışıqlarda tərəflərin hələ də bəzi mübahisəli məqamlar üzərində işlədiyini, lakin ümumi çərçivə sənədinin yekunlaşdırılmağa yaxın olduğunu açıqlayıb.
Bildirilib ki, Pakistan Ordusunun Baş Qərargah rəisi Asim Munir də Tehran və Vaşinqton arasında mesajların ötürülməsi prosesində vasitəçi kimi çıxış edib.
